قصيدة الفقر

قصيدة الفقر


قصيدة الفقر




ياللي تقول الفقر ماهـو بعـذروب
انشهد انه مـن كبـار العذاريـب
ياكم رجال مـع النـاس محبـوب
خلاه يبعـد عـن محبيـه ويغيـب
وياما طرح من واحدا كان منصوب
مايرجم الطيب ولايعـرف الطيـب
حتى الكريم اللي من الناس محسوب
لاحـل فـي داره تقـل التراحيـب
عينه تخيل الطيب لكـن مقضـوب
يمنـاه ماتقـدر تقـدم مواجـيـب
تقصر خطاه ويلتبس للردى ثـوب
غصبا عليـه ولايـدور مجانيـب
ويصغر بعين الناس ويطيح ويذوب
لوهو من اول من كبار الاشانيـب
الناس ماترحـم ولاتستـر عيـوب
واشيب عينك شيب يافاضي الجيب
انا دري ان الرزق للعبـد مكتـوب
قسمه من الله مالاحد فيـه تطبيـب
احدا فقير وطـول الايـام مكئـوب
شايل همومه كبر حـدب المراقيـب
ماله وعقلـه للرجاجيـل مسلـوب
كلا عليه يحد عينـه كمـا الذيـب
واحدا رصيده من جنيهات مصبوب
يمكن رصيده ماتحسبـه حواسيـب
عايش بالهدنيا ولابليـس مغلـوب
عيشة بذخ مامن وراهـا مكاسيـب
يسرح ويمرح في ملـذات وذنـوب
بين السفر ومخلطـات المشاريـب
وان جاله اللي من لياليـه منكـوب
حده زمانـه والسنيـن الحواطيـب
ارسل عليه من المناديـب منـدوب
قال اصرفه ماني بناقـص اكاذيـب
لكن لوجاله مـن النـاس مذبـوب
ماهوبحاجه لكـن راعـي هناديـب
يرخصله الغالـي ويفتحلـه قلـوب
ويقول امر ويش عنـدك مطاليـب
مايدري انه لابس الثـوب مقلـوب
ثوب الردى ماهو بثوب المناصيـب
المال فنجالا مع الوقـت مشـروب
وراعيه حظه يرتفع فيـه ويخيـب
ان قدمه في خير ياخيـر مطلـوب
وان قدمه في شر نـار ومشاهيـب
لاخير في مالا على الشر مجلـوب
سحتا ومدخاله على الشك والريـب
ولاخير في مالا على كف هبهـوب
ولابخيـلا بـارد عظـام ومهيـب